نصوص

“هردبيس.. نص مسرحي للكاتب: ناجي عبد الله

 

هردبيس..

تأليف: ناجي عبد الله

مؤلف مسرحي مصري

ـــــــــــ

{ خشبة مسرح … بلا أى ديكور …. فقط هناك بقايا ديكور قديمه ..
هناك أيضا ألواح خشبيه متناثره … صناديق .. براميل .. إطارات
سيارات … بقايا شباك صيد قدبمه … سلم معدنى يؤدى الى مقعد
صغير خاص بمنقذ الشاطىء ….
يدخل شاب … يرتدى ملابس ثقيله … و نظارة طبيه …. يحمل فى
يده حقيبة أوراق … يتلفت حوله فى استغراب …..}

المؤلف أيه دا …. معقوله … هو دا المكان …
( يتحرك فى المكان … )
المؤلف أيوه … أكيد هو ….. أدى السلم بتاع الأنقاذ … وآدى
الرايه السوده ….
( يضع حقيبته على أحد البراميل … ثم يتحرك )
المؤلف أما الأستاذ دا غريب بشكل … وقال إيه … المكان
د هو الوحيد االى لما بيحب يألف بيروح له …
( يعاود النظر للرايه السوداء … ثم للمكان عامة )
المؤلف مكان كئيب .. كئيب … بس عادى … ماهو الأستاذ هو
كمان كئيب …
( يتحرك للحقيبه …. ينظر إليها ….)
المؤلف و قال إيه …. الروايه دى عاوزك تقراها كلها و تكتبها
من أول و جديد .. وهى دى أول مره … ماهو كل مره
أنا اللى بكتب.. وهو يحط أسمه .. يا سيدى .. ما علينا.

( يفتح الحقيبه .. يخرج منها أوراق كثيره .. فى حالة
فوضى … يبدأ فى قرائتها .. )

المؤلف ( يقرأ ) هردبيس … دا إسم دا .. ولما أسأله يعنى
هردبيس يا أستاذ .. يبص لى من فوق لتحت ..
و يمصمص شفايفه .. ويقولى .. لسه قدامك كتير على
ما تعرف يعنى إيه هردبيس …
ليه بس يا أستاذ …..؟
علشان إنتوا جيل لابيسمع ولا بيشوف ولا بيحس ..
هردابيس دى … هى المعنى .. هى المضمون .. هى الكل المحتوى على الجزء .. والجزء المتشعب لأجزاء
والأجزاء تنتشر وتتوغل وتستمر …
وأنا مالى .. نقرا بقى ….

( يقلب فى الأوراق … يظهر عليه الإنزعاج .. )
المؤلف إيه ده .. الفصل الرابع .. أمال فين الفصل الأول .. أيوه .. وآدى الثانى .. ودا الأخير.. لا ..لا .. دا حرام والله ..
( يضع الأوراق أعلى الحقيبه.. ويتحرك بعيدا غاضبا )
المؤلف يعنى مش كفايه هاكتبها من الأول .. لأ … دا عاوزنى أرتبها كمان .. وأنا مالى أنا بقى … أنا أقعد لى يومين.. تلاته .. وارجع له .. واللى يحصل يحصل .. دى حاجه تجنن …
( وبينما هو يحادث نفسه … إذا بالهواء يشتد .. يطيح بأروراق الروايه .. تتناثر … يسرع اليها )
المؤلف يانهار أسود..الروايه.. الأستاذ ..هى ناقصه لخبطه؟
( المؤلف يجرى يمينا و يسارا .. يحاول الامساك بالروايه ..
وما ان يمسك بورقة حتى تطير الاخرى ..
يجرى .. ويلف .. ويدور … حتى يناله التعب ……
فيقف عاجزا تماما .. الى ان تهدا الرياح قليلا .. و تتوقف الاوراق عن الطيران ..
و تبدأ فى التساقط أرضا و لكن .. مع تساقطها …
و كلما لامست أى ورقة الارض …
اذا بها تتحول رجلا … شابا …أمراة …
حتى يجد الاوراق أمامه … و قد تحولت أشخاصا … يمتلىء رُعـبـا … ينكمش جانبا … بينما … يتحرك الاشخاص ببطىء )
• رجل1 أيه دا…أحنا فين…؟
• رجل2 و ايه المكان الغريب ده….؟
• رجل3 ايه اللى جايبنا هنا…؟
• رجل4 ( للمؤلف الواقف مذهول) وانت… انت مين …؟
• المؤلف أنا … أنا … أنتوا……انتوا اللى مين؟
• رجل 5 انت مكنتش معانا…
• رجل6 لا لبسك لبسنا…
• رجل6 و لا شكلك شكلنا….
• رجل2 بس باين عليك زينا…
• رجل3 دا باين عليه اكتر مننا….
(تتحرك أمراه1 فى المكان..)
• امراة1 أحنا…. زى ما نكون رجعنا تانى…
• امراة2 (فى فزع) إيــه…!! .. رجعنا تانى …..لأ….مستحيل

(ينكمش الجميع فى رعب…)

• الجميع لأ…. مستحيل…
• امراْة1 صدقونى … باين لها الدنيا.
• امراْة2 (تنطلق فرحة) الله ….. الدنيا ….
• رجل1 فرحانه على ايه…؟
• رجل2 انت مش عارفه اللى بيحصل هنا ايه..؟
• رجل3 انت لسه صغيرة…. ما تعرفيش …؟
• رجل4 ما عـشـتـيـش ……
• رجل5 ما اتجرحتيش ….
• رجل6 ما اتهانتيش…….

• رجل1 و لا حاولتى تصرخى و ما عرفتيش.
• رجل2 و يوم ما صرختى ما اتسمعتيش.
• رجل3 و يوم ما اتسمعتى خلوكى ماتساويش.
• امرأْة1 ولا يوم باعوكى من غير فلوس…
• امراْة2 فى زمن رخيص…زمن النخوس …

(وهنا يتدخل المؤلف غاضبا…)

• المؤلف بس .. بس .. فيه ايه بقى …
( يحاول التذكر ) …. آه …
أكيد الأستاذ عامل فيا مقلب علشان يجننى …
• رجل1 مقلب إيه ياجدع إنت ……؟
• رجل2 وأستاذ مين ……؟؟
• المؤلف امال انتوا مين ….؟؟
• الجميع (بقوة) الاول انطق….انت مين…؟؟؟
• المؤلف أنا.. أنا المؤلف اللى هاكتب الروايه …
• الجميع اّه … و إحنا بقى كل الروايه …
• امرأة 1 من البداية للنهاية …

• رجل4 (يغنى) عشنا فيها و ياما عشنا.
• امرأة1 (تغنى) شوفنا فيها ياما شوفنا.
• رجل5 شاركنا فى كل احداثها.
• رجل6 اوقات دور البطولة.
• رجل1 و اوقات بطولة تانية.
• رجل2 و اوقات كتير مجرد مجاميع.
• رجل2 كومبارس يعنى
• امرأة1 اوقات رومانسية.
• امرأة2 و اوقات كتيرة حزينة.
• امراْة3 أو مغرية .
• رجل1 و مش فى الرواية دى بس ..
• رجل2 د انت هتلاقينا فى كل الروايات.
• رجل3 ها …عرفت إحـنـا مين و لا لسه….

• المؤلف أنا… انا مش فاهم أى حاجة.

• رجل 4 و هاتفهم إزاى وإنت مش منـنـا …
• رجل5 لا عمرك عشت اللى عشناه … ولا شفت اللى شفناه.
• رجل6 ياه… مشوار طويل … طويل أوى ….
• رجل1 مشوار طويل و يا ما مشينا فيه …..
• رجل2 و صدقنا … مش بمزاجنا .
• رجل3 بمزاجنا ازاى .. دا احنا مجرد اسامى … اسامى و كتبونا على
الورق ..
• امرأة1 لا الكلمة كلمتنا
• رجل1 و لا القرار قرارنا..
• امراْة1 لا احنا اللى اخترنا نقرب.
• امراْة2 ولا احنا اللى اخترنا نتغرب ..
• رجل2 لا الضحكة ضحكتنا …
• امرأة3 و لا الدمعة دمعتنا ..

• المؤلف لا لا أنا لازم بخرف… أيوه .. أيوه بخرف .. يا اما جانى دوار
بــحــر.
• امراة2 ياعينى ….. دا صعبان عليا اوى ..
• امرأة3 ايه…. هو حصل ……؟
• امراْة1 حصل ولا ما حصلش … لا هو بمزاجها .. دا حسب ما الدور
مكتوب لها…
• امراْة2 لا….. المرة دى انا اللى حاسة ..
• رجل1 حاسة ايه بس…..
• رجل2 انت بتحسى اللى انكتب لك…..
• رجل3 واوقات كتير بتحسى احساس اللى كتبك…..
• رجل4 يعنى لا الحب ولا الكُـره يوم بيدك …..

• رجل 5 على فكرة ياجماعة … أنا مصدقها …
• رجل6 مصدقها … ؟
• رجل5 أيوه … أصل أنا برضه حاسس …
• رجل 1 حاسس ايه … برضه ناحيه الجدع ده ….

(يشير على المؤلف)

• رجل5 لا ياخفيف …انا حاسس ان احنا هنا المرة دى بمزاجنا …
• الجميع ييه … دا بيخرف .
• المؤلف أيوة … أنا بخرف.
• امرأة2 يا عينى …. حرام عليكم… طب حد يفهمه..
• الجميع ( يقلدونها بسخريه) حـد يفهمـــه …
• رجل3 حاضر يا جميل …. أنا هافهمه ..
• رجل4 لأ …. لأ سيبنى انا .. انا اللى افهمه.

(يتحرك رجل5 للباحث )
• رجل5 مالك يا حضرة … حاسس بإيـه …. ؟؟
• المؤلف أبداً يا أخى .. بيتهيألى حاجات غريبة أوى…. قال إيه….
كأنكم واقفين قدامى.
• رجل4 طب ما أحنا فعلا واقفين قدامك ….
• المؤلف ياراجل …. دانا اللى بيتهيألى …
• رجل4 طب لو سمحت .. ممكن تبص ناحيتى …
(يتحرك المؤلف تجاه رجل5)
• المؤلف ناحيتك فين بس … دى مجرد هلاوس سمعية بصرية ..
و انا اللى بيتهيألى .
(رجل 5 يصفع المؤلف بقوة على وجهه)
• رجل4 طب و كده …. (يصفعه بقوة)
• المؤلف )يتالم فى فزع) اّه …..
• رجل4 ها … لسه بيتهيالك.
(يتركه … و يتجه الى المجموعة …)
• رجل4 ياسلام … شوفتم … ادينى ضربت المؤلف على وشه ..
اخيرا عملت حاجة بمزاجى.
• امراْة2 حرام عليك عملك ايه ده.
• رجل3 ده … دا واحد من سبب كل اللى احنا فيه.
• رجل4 سبب كل اللى حصلنا….
• رجل5 واللى هايحصل لنا.

• المؤلف وايه اللى حصل .. و اللى بيحصل .. انا مش فاهم فهمونى.

• رجل3 و مهما حكينالك … برضه مش هتفهم
• رجل4 أصل كل اللى حصل و اللى بيحصل لا حد يصدقه و لا حتى
يفهمه…
• امرأة1 جنون … دا اكتر بكتير من الجنون ..
• المؤلف و ايه يعنى ما احنا فى زمن الجنون و الكدب و الفوضى.
• رجل6 زمن الجنون و الكدب و الفوضى و فى الاخر احنا الضحايا …
• المؤلف و ما رفضتوش ليه …. ؟
• رجل1 نرفض … انت عبيط … بنقولك احنا مجرد اسامى
… اسامى على الورق …

• رجل2 يحطونا….
• رجل3 يبعدونا…
• رجل1 يشركونا …
• رجل2 أويلغــونا..
• امرأة1 وان حبوا فى يوم يشطبونا.
• امراْة2 مش محتاجة غير جرة قلم.
• امرأة3 نتشطب فورا من كل الرواية.

• الجميع وانت اهه…. متهيألك انك عايش مش كده
• المؤلف (يفكر) هه …. طبعا عايش.
• الجميع وكمان القرار قرارك …. صح …؟؟
• المؤلف طبعا.
• الجميع ما تصدقش … دا انت يا مسكين مجرد اسم …. اسم و مكتوب
ع الورق و برضه … بتعمل كل اللى انكتب لك.
• رجل يحيوك.
• رجل2 يموتوك.
• الجميع او حتى يرموك فى الزبالة … مش مهم …
• امراْة1 و عندك مثلا …. ايه فى حياتك عملتـه برأيك …..؟
• المؤلف ( يفكـر ) هـــــــه …..
• امراْة2 عمرك فكرت تقول لا… او حتى فى يوم ترفض.
• المؤلف ايه … ارفض ….؟؟

• الجميع ما تفكرش … مش هتقدر…. دا حتى مـوتك … مش فى يدك.
• المؤلف و مين اللى موته فى يوم بــيــده.
• الجميع شوفوا العبيط …. دا بيتكلم عن اخر موته..
• المؤلف (يتعجب) إيه..!! اخر موته .. لا هو فيه أخر موته و اول موته
…. ما كلها موته.
• امرأة2 يا مسكين … دا حتى مش حاسس بموته.
• المؤلف ايه يا مجانين .. موت ايه …. ما انا عايش اهو قصادكم.
• امراْة2 طب تعالى … و حاول تفتكر …
• المؤلف (فى عصبية) افتكر …. افتكرر ايه …؟؟؟

• امراْة2 يوم ما كان فى قلبك حب و اتخنق … ما متش معاه … ؟
• امرأة3 يوم ما حلمك قصادك انقتل … ما متش معاه….؟
• رجل1 يوم ما كان ليك حق و قصادك اتسرق ما متش معاه….؟
• رجل2 يوم ما جيت تصرخ لظالم و تقول لا و ما اتسمعت… ما متش معاه؟
• رجل3 يوم ما قدروا يخلوك حد عادى … من غير حلم .. من غير حس ..
ما متش معاه…..؟؟؟؟؟
• الجميع يا صاحبى اللى انت متعرفوش … انك مت كذا مرة …
بس ما تعرفش .. وما تستغربش … مش انت لوحدك كده.. ده كلنا..

(تتحرك إمراءه 1 فى بؤرة ضوء … بينما يعم الظلام على الجميع …
إلا المؤلف … الذى ينزوى بعيدا … متابعا …)

• امرأة1 عمرى ما هانسى …. يوم ما فى لحظة بابص فى حضنى
و ما لقيتهوش ..
• المؤلف بتتكلمى عن مين …؟
• امراْة1 عن حلم عمرى … اللى انتظرته بالسنين …
• المؤلف قصدك ايه …؟
• امراْة1 كان هنا … بين دراعاتى .. كان جوه حضنى ..
و فى لحظة واحدة اتخطف…. أخدوه بعيد.
• المؤلف هما مين …؟ وهو مين …. ؟
• امراءه1 (بعصبية ) إبنى يا بنى آدم … انت ايه ما بتفهمش …
(تتحرك بعيد عن الجميع … خطواتها.. و هيئتها.. كالحامل)
• امراْة1 9 شهور….وهو عايش جوايا.
(تتحرك امرأة2… كالحامل ايضا)
• امراْة2 كان كل ما يتحرك جوه بطنى بيتعبنى ….
• امراْة1 و اطبطب عليه و اقوله يا واد … بطل ترفيس …
• الأثنتان لكن يوم ما حركته قلت … اترعبت..
• امراْة1 ويوم ما اتولد …. ياه …. نسيت كل الوجع …
(يتقدم اليها رجل1)
• رجل1 فاكرة …. فاكرة كان صغير قـد ايه ..؟
• امرأة2 كان جميل … كان برىء … الكل قال .. أنه شبهك .
(يتحرك اليها رجل2)
• رجل2 لا…..دا شبهك…. شبهك انت … حتى بُصى ..
• امرأة1 كان فى نومه زى الملاك…
• رجل1 كنت بانسى هموم الدنيا لما أبُص عليه و هو نايم.
• امرأة1 ولا ضحكه.
• امراْة2 ولا لعبه…
• امراْة1 ولا اول كلمة قالها …..

• رجل1 )معاكسا) أول كلمة قالها … قال يا بابا …
• امراْة1 لا قال يا ماما…. ولا ناسى.
• رجل2 ولا فاكرة يوم ما جت له مرة حمى.
• امراْة2 يومها مُت.. و فضلت جنبه طول الليل صاحيه ….
• رجل1 ولا يوم ما طلعت له سنـه…..
• امراْة1 يومها طـرت.. و قلبى رقص من الفرحة.
• امرأة1 وأول خطوة وانا كنت سانداه بـإيديا.
• امرأة2 و لما اخدته فى أول يوم للمدرسة….
• أمراْة1,2 و قعد يعيط…. و مش عاوز يسيب ايديا…

• رجل1 و فاكرة يا عمرى يوم ما كبر و إتخرج من الجامعة…
• امرأة1 ولا يوم ما شاف اخوته بتتعاكس و ضرب اللى بيعاكسها حِتة علقه.
• امرأة2 ياااااه … سنين طويله عدت علينا…
• امراْة2 بس و لا لحظة بعد عينيا.
• امراْة1 دا حتى عروسته….. عروسته انا اللى اخترتهـالــه.
• امراْة2 بنت هادية و متربية.
• امراْة2 اول ما شافها قلبه حبها.
• امرأة1 و ادينا أهه….بنجهز لهم.
• الإثنتان و مرة و احدة.. بالتفت… مالقتيوش … أخدوه بعيد …. بعــيــــــد.

(على الجانب الاّخر…. يتحرك رجل4.. بخطوات عسكرة.. ينادى
بأعلى صوته …)
• رجل4 ياله يا بنى أدم انت وهو… الكل يقف هنا ثابت…. انتباه.

(يتحرك جميع الأفراد … يؤدون جمعيهم نفس الحركة… و نفس
الأوامر ….)
• رجل4 انتباه…..
لليمين در…..
للشمال در…
(الــجــمــيــع يـــؤدون … ثم يوجه حديثه لرجل5 ..)
• رجل4 فرقة تدريبك انتهت…. جاهز يا جندى…..؟

( وبخطوات عسكريه … جاده … يتقدم رجل 5 .. يقف إنتباه )

• رجل5 )بصوت عسكرى) جاهز يا أفندم …..
• رجل4 ضرب النار……؟
• رجل5 جاهز ياأفندم …..
• رجل4 الألغام ……؟
• رجل5 تمام ياأفندم.
• رجل4 و الاوامر…؟
• رجل5 كتاب مقدس.
• رجل4 و افتكر كويس … الدنيا النهارده غابة ….
• رجل5 (يكرر) … الدنيا النهارده غابة…
• رجل4 و فى الغابة بيعيش الأقوى.

(يتناقل باقى الافراد الجمل.. ولكن.. يؤدونها بحالة انكسار…
و عدم اقتناع..)

• رجل1 و فى الغابة بيعيش الاقوى.
• رجل4 و ما فيش قوة من غير سلاح…….
• رجل2 و ما فيش قوة من غير سلاح.
• رجل4 بسلاحك …الكل هيخضع………….
• رجل3 بسلاحى…..الكل هيخضع…
• رجل4 ضعفك و نهايتك فى كلمة رحمة.
• رجل5 ضعفى و نهايتى … فى كلمة رحمة.
• رجل4 كل حلم …. كل مجد…. كل سلطة…. و ليهم ضحايا ….
و لازم تختار…. يا تبقى السيد… يا تبقى العبد.
• رجل5 تمام يا أفندم.
• رجل 4 أى حد يرفض يطاطى .. ويبقى عبدك … يبقى عدوك … ولازم
يموت ……
• رجل 5 ( بغير رضا ) …. يموت يا أفندم ….
• رجل4 جهز سلاحك و استعد..
• الجميع جاهز ياأفندم.

(يتحرك رجل4 بعيدا … مع هدؤ الاضاءة إلا عن بؤرة ضؤ على
فرد 5…الذى تتحرك اليه امرأة 1 ..)

• امرأْة1 و لما جانى ….ماعرفتوش…

(تتحرك امرأة 2 لرجل3 الذى يقف امامها فى بؤرة ضؤ)
• امراْة2 الوش نفس الوش أيوة ….
• امراْة1 نفس الملامح….بس مالقيتوش…
• امرأة2 كنت حاسة بشىء غريب….
• امرأة1 بشىء رعبنى…
• امراْة2 بقى هو دا ابنى…
• الأثنتان لاْ غيروه…أيوه غيروه ..
• امرأة1 شاله قلبوه و حطوا ايه…؟
• امرأة2 حطوا قسوة …
• امرأة1 حطوا كـُـره …
• الإثنتان حطوا حب كلمة دم ….

(تتحرك امرأة1 مع رجل5)
• امرأة1 هاتسافر….
• رجل5 الواجب يا امى …
• امراْة2 (لرجل3) طب ما يسافر حد غيرك …
• رجل3 شباب كتير هاتسافر معايا ..
• امرأة1 (لرجل5) أيوة… لكن أنا خايفة عليك ….
• رجل5 لا يا أمى .. ما تخافيش .. و ابقى سلمى على و الدى لما يرجع..
• امراْة1 و كمان أبوك مش هاتشوفه ..
• رجل3 ميعادى جه خلاص يا امى…
• امراْة2 طب و العروسة و الفرح….؟
• رجل1 جهزوا انتوا كل حاجة لحد ما ارجع…
• امراْة2 و ها ترجع امتى ..؟
• رجل3 يومين تلاتة و يمكن اكتر ..
• امرأة1 هاتحاربوا يا ابنى …
• رجل5 دى فسحة يا امى …
• رجل3 هما قالو دى زى فسحة …
• رجل5 أو حتى رحلة …
• الأثنان ما تخافيش …
(اظلام على الجميع .. ثم اضاءة على رجل 1 و رجل 2 ..
اللذان يبدوان وكأنهما يزرعان أرضاً ..
ليدخل عليه رجل 6 يحادثه بقوة .. )

• رجل6 انت…. (يلتفت الإثنان )… أيوه انت .. إنت وهو …
إرمى اللى فى ايدك دا وتعالى هنا بسرعه ….
• رجل1 عاوز ايه …
• رجل6 تعالى هنا …. (يتحرك الجميع) ايوه هنا … ياله إسمك ..؟
• رجل2 ما هو مكتوب عندك…
• رجل6 مهنتك ايه….؟
• رجل1 ما انت شايف… مزارع ..
• رجل6 عمرك ….؟
• رجل 2 وإيــه فايدة عــده …
• رجل6 باقولك عمرك…؟

• رجل2 ما فكرتش يوم اعده..
• رجل6 حاربت قبل كده….
• رجل1 يوووه …. ياما حاربت الدوده و اللُطع.
• رجل6 طب قتلت يوم ….؟
• رجل1 طبعا قتلت… ( هامسا ) قتلت ديب كان رايح لغنمى …
• رجل6 (ساخرا) قتلت ديب …. طيب ياله … ياله روح …

• رجل2 أروح لاْرضى …
• رجل6 روح للشاويش و اصرف سلاح …
• الثلاثة: سلاحى فاسى …
• رجل6 نفذ الاوامر و أصرف سلاح …
• رجل1 و هاصرف بس سلاح لاجل ايه ..؟
• رجل6 لاْجل ما تحارب معانا… ياله…. دول قربوا يابنى آدم ..
• رجل2 هما مين دول اللى قربوا ..؟
• رجل6 العدو ..

• رجل1 العدو … انا ما اعرفش اى عدو غير الدودة و اللطع ….
( متذكرا ) لأ …. و الفقر و المرض ….
• رجل6 طب و البلد .. و الحكومة .. و الزعيم .. مين هايحمى دول ..
• رجل1 و فين الجيوش … اللى بتاخدوا منا ياما الاجل ما تزودوها …؟
• رجل6 اسمع بقى … يا تاخد سلاحك .. يا اقتلك بنفس السلاح.
• الثلاثة يا عم انا مش بتاع سلاح …. انا فلاح.

• رجل6 مش مهم… المهم تكون دايما مستعد ….
و أول ما انادى اضرب …. تضرب … ياله إستعد ….

(ينصرف رجل6… لتتحرك امرأة 3… امام كل رجل 1 و 2)

• امرأة3 مالك يا جوزى….حزين كده ليه ..؟
• رجل1 قالوا حارب ….
• امراْة3 تحارب .؟… وإنت كمان يا أخويا …
• رجل2 ما انا قلتلهم ما سمعوش ..
• امرأة3 طب و أرضك ..؟
• رجل1 قالوا لى يوم هارجع لها ….
• امرأة3 طب و زرعك….؟
• رجل2 البركة فيكِ …. إبقى راعيه ..
• امرأة3 وولادنا طيب….؟
• رجل1 ما انت برضه هاتراعيهم …
• امراْة3 اخويا و جوزى …. هاعيش ازاى من غيركم …. دانا محتاجلكم ….
• الاْثنين على عينك أسيبك و أمشى … بس مسير الحى يتلاقى …..

(يصعد رجل6 أعلى السلم المؤدى لمقعد الأنقاذ .. ممسكا فى يده نظارة مُـعـظـمه .. ينظر بها يمينا و يسارا .. ثم ينادى يأعلى صوته)

• رجل6 الحقوا …. دول بدأوا يتحركوا … استعدواكلكم …. ياله أجهزوا

(يتحرك رجل 1 و2 … ممسكان بالسلاح …. يختبئان خلف االتلال.. على الجانب الاّخر…
يتحرك.. رجل4… فوق تلك الكتل الصخرية … فى يده نظارة مُعظمة ينظر بها يمينا و يسارا… حتى يرصد القوات الاّخرى…
يتحدث مشيرا تجاههم)

• رجل4 أهم .. هما دول اللى رفضوا يوطوا راسهم …
هما دول اللى العند راكبهم …
ياله .. استعدوا نمحيهم من الوجود ..
لاجل ما يبقوا عبرة لكل الوجود ..

(يتحرك رجل 3 و 5 ..يتخذان ساتر يحتميان خلفه ….
فيصبح لدينا جيشان …
الجيش الاول …. قائده .. رجل 6 .. امامه رجل 1 و 2 …
و الجـيش الثانى … قائده رجل4 …. و امامه رجل 3 و 5 …. كلاهما فى المواجهه و لكن من خلف الساتر …)

• رجل1و2 سلم نفسك….
• رجل 3و5 انت اللى سلم…

• رجل1و2 انت اللى جاى علينا تهجم.
• رجل 3و5 وانت ليه مش بتستسلم.

• رجل1و2 هنا بيتى و ارضى.
• رجل3و5 و انا فيه اوامر عندى.

• رجل1و2 هنا شرفى و عرضى…
• رجل 3و5 لمصلحتك سلم.

• رجل1و2 سلم انت…أو… أو حتى امشى.
• رجل3 و5 اقتلك الاول و امشى.

• رجل1و2 و ليه تقتلنى …..؟
• رجل3و5 قلتلك دى اوامر عندى.

• رجل1و2 تقتلنى كده … من غير ما اضُرك…!!؟؟
• رجل3و5 رفضك هو اللى ضرك.

• رجل1و2 انا رافض ابقى عبدك.
• رجل3و5 ما انت عبد جوا أرضك… و انا جاى احررك من سجنك ..

• رجل1و2 انا ماطلبتش تساعدنى..
• رجل 3و5 مش عارف مصلحتك …

• رجل1و2 و انت اللى عارف…؟؟؟
• رجل3و5 هما عرفوا….

• رجل1و2 هما مين..؟
• رجل3و5 اللى أمروا احررك…

• رجل1و2 انا ما اشتكيتش…
• رجل3و5 هما حسوا …. هما قلقوا …

• رجل1,2 هما مين ….؟؟
• رجل5,3 اللى فاهمين كل حاجة …. و يقدروا يعملوا كل حاجة.

• رجل1,2 انا مش فاهم أى حاجه.
• رجل3و5 يبقى سلم ..

• رجل2,1 مش ها سلم ….
• رجل3و5 هاقتلك.

• رجل2.1 أو هاقتلك.
• رجل3و5 مش هاتقدر.. انا أقوى منك.. سلم أحسنلك …

• رجل1 لأ مش هاسلم….
• رجل2 هنا أرضى و زرعى.
• رجل1 هنا بيتى و كل أهلى.
• رجل1,2 أرجع بقى بلدك و سيبنى….

• رجل5 علشان ما هـارجع لازم تسلم.
• رجل3 أرجوك تسلم.
• رجل5 أمى و عروستى فى انتظارى.
• رجل5,3 ياله… سلم …

• رجل2,1 مش هاسلم.

(و هنا…يتدخل رجل4 بكل قوة و حزم)

• رجل4 إستعد لضرب النار.

(وعلى الجانب الاّخر ينادى رجل 6 بنفس الحزم)
• رجل6 الكل يستعد للضرب…

(و يصرخ الاثنان فى نفس اللحظة ….)

• رجل6,4 اضرب….

(يعلو صوت طلقات الرصاص.. يعلو الضجيج .. تعلو الصرخات فى كل مكان.. تتلاعب الأضاءة.. ثم تهدأ..
لتعود..
على كل امرأة تتحرك فى بؤرة ضوء… باكية… تخطو فوق جثث الجميع…… فيما عــدا القادة … 4,6 لازالا أعلى المكان …. )

• امرأة1 و من يوميها و حضنى فاضى..
• امرأة2 و من يوميها مارجعتش تانى.
• امرأة3 و من يوميها و أرضى بارت … و زرعى دبل ..
• امرأة1 ما بقيتش باسمع من يوميها كلمة يا ماما ….
• امرأة2 ما بقيتش حاسة من يوميها بالدفا … بالأمان …
• امرأة1 أخدوه و أخدوا كل عمرى .. اخدوا بكرة …
• امراْة3 اللى اتقتل مش بس جوزى….
• الثلاثة لا.. دا أبويا .. أيوة و ابنى .. و أخويا .. و كل أهلى …..
اللى اتقتل دا يبقى عمرى … كفاية …. كفاية ……

(اظلام عليهن .. ثم اضاءة بؤرتين على رجل4,6 ….
يتحركان من أعلى اماكنهما الى اسفل)

• رجل4 ماشى .. كفاية لحد كده … هاديلك هدنة تفكر انك تستسلم ….
• رجل6 قول هدنة لنفسك بعد اللى حصللك…
• رجل4 انا كان ممكن أمحيك من على وش الدنيا ……
• رجل6 و انا كنت خلاص هادمرك بعد ثانية…
( النساء الثلاثة تصرخن )

• الثلاثه كفاية….. كفاية ..

• رجل 4 عشان خاطرهم .. هاديلك فرصة … وتعالى نفكر فى السلام ….
• رجل 6 ما ده اللى كنت باقوله من زمان ….
(يتصافحان… و تظهر امرأة 1,2,3 … يدُرن حول الاثنان … )
• امرأة1 ( بذهول ) واللى ماتوا …..
• رجل4 دول أبطال… ماتوا فدانا … فدا الوطن.
• امرأة3 طب و جوزى.
• رجل6 جوزك شهيد … و مسيرنا يوم هـا نكرمه.
• امراْة2 و ابنى اللى مات …. تمنه نيشان …
• الثلاثه كان ليه دا أصلا من أوله..

( يدخل المؤلف … يمر فوق الجثث .. فوق القتلى … وعلامات الذهول
و الحزن تملأ وجــهــه …..)

المؤلف كان ليه دا أصلا من أوله …. ليه ما بيفكروش ألا فى نفسهم ..
فى رأيهم ….حلمهم … وتموت فداه كل البشر .. ليه .. ليه ..؟

(و يتحرك حوله الجميع .. مع عودة الإضاءه .. وعودة الحياة مرة
أخرى …. وكأن شيئاً لم يكن ….. )

• رجل1 ايه يا عم….انت اندمجت و لا ايه … ؟؟
• رجل2 ولا لسه جاى تحس النهارده….. ؟؟
• امرأة1 و لا كنت نايم …. ولا تايه … ولا ..
• الجميع ولا ميت ……!!!!

• المؤلف أيوة ميت…. ميت بالحيا … و لسه جاى النهارده أحس انى ميت …

• الجميع و ياترى .. فاكر أول مره مُـت فيها …
• المؤلف أنا فاكر أول مرة دُبت فيها….
• الجميع بنقولك مت….
• المؤلف ما انا لما دُبت … عشقت …. حلمت …. وما طـُلت … فـمُـت.
• امراْة2 يا عينى عليك … ما تسيبوه يقول ويحكى .. سيبوه يمكن يفضفض..
( للمؤلف ) ….. قول .. إحكى .. انا سمعاك وحاسة بيك…

(يتحرك المؤلف… فى بؤرة ضوء… واظلام على الجميع ..)

• المؤلف كانت معايا فى الشغل … أيوه .. كنت لما باشوفها بانسى
نفسى … والزمان .. والمكان … وماافتكرش الا هى .. وفى
يوم… قررت اصارحها…

(يتحرك للوسط .. لتكون أمامه امرأة2..
والتى تنظر فى الجهة الأخرى)

• المؤلف لوسمحتِ … ممكن نتكلم مع بعض شوية …
(تلتفت اليه بغاية الرقة)
• امراة2 خير…فيه حاجة…..
(ينظر فى عينيها…ليأتى صوت من الخلف)

• رجل1 رفعت عينيها …هربت منها…
• رجل2 لقيت كل جسمى بيرتعش…
• رجل3 مش مهم….أكيد من البرد..
• رجل4 و مرة واحدة… جمدت قلبى ..
• رجل5 و بصيت تانى جوا عيونها …
• رجل6 و مرة واحدة … لقيتنى دوخت …
• رجل1 لقيتنى توهت …
• رجل3 لقيتنى دُبت ….

• رجل5 قمت هربان لاى حتة بعيد عن عيونها….
• الجميع و قلت لها و اْعصابى بايظة … و صوتى كله بيرتعش..
• المؤلف عُلا….انا…انا بحبك..
• رجل1 و قبل ما أكمل حروفها …
• رجل2 الدنيا كلها لفت بيا ….
• رجل3 و لقيت راسى مكان رجليا …
• رجل4 و ما بقيتش قادر استحمل دقات قلبى …
• رجل5 أما هى ….

• رجل6 فـبـنـبـره هادية و كل رقة …
• الجميع سألت من تانى ….
• امراْة2 معلش … انا اسفة… قلت ايه … ؟
• رجل5 يا نهار أسود … بقى عاوازنى أقول من تانى إنى بحبك…
• رجل1 طب ازاى … دانا خلاص … مش قادر … اقف على رجليا …
• رجل5 و لا أقولك … ثانية واحدة … هاقعد شوية …

• رجل1 هى ثانية ألقط فيها نفسى و بعدين هاحاول اقولها من تانى …
• امرأة2 مالك فيه ايه .. ؟
• رجل2 حاولت أبعد عن عيونها ….
• رجل3 عشان ما الاقى حروف نفس الكلمة…
• الجميع أيوة … أهى …
• المؤلف يا عُـلا..انا بقولك …. انى …. بحبك…
• رجل4 بصيت لى … و دمعه صافية.. لمعت جوا عيونها …
• رجل5 و اللون الاحمر الربانى لون خدودها….
• الجميع و قالت….

• امرأة2 يا أخى …. ما انا سمعتها من اول مرة… بس كنت عاوزة
أسمعها تانى عشان تملا قلبى و اتمتع بيها…
• المؤلف انا مش مصدق … قصدك انك ….
• امراْة2 ايوة قصدى…..
• رجل1 حسيت انى هايغمى عليا….
• رجل2: لأ…دانا طاير…. طاير لحد ما لمست السحاب بأيديا ….
• رجل3 طب اعمل ايه…؟

• رجل4 أرقص ….
• رجل5 أغنى ….
• رجل6 يمكن لو فى بلد تانية … حتة تانية… بشر تانية …
• رجل1 يمكن كــنــا عملنا حاجات كتير ….
• الجميع انما احنا … بتربيتنا … وفى بلدنا .. و كمان هنا فى الشغل..
• رجل3 د احنا بكره هـانكون مفصولين …
• رجل5 و مش بعيد صورتنا تنزل فى الجرايد و يققولوا حبوا بعض
المجرمين…

• الجميع اصلنا اتعودنا نعمل كل حاجة فى الضلمة تمام زى الشياطين..
و نبان قدام بعض زى الملايكة الطاهرين.

• امرأة2 ها….هاتفضل ساكت
• رجل1 ما هى المصيبة… انى ماكنتش مجهز م الكلام
• رجل2 غير انى اقولك يا علا بحبك
• رجل3 دا انا مش عارف حتى هاقول ايه بعد كده
• الجميع: أيوه …. مافيش غيرها … أيوه هى ..
• المؤلف علا…. تتجوزينى ..
• رجل1: وبكل فرحة…. دمعة نزلت من عيونها ..
• رجل2 باست خدودها …
• رجل3 وكأنها بتبارك لهما …..

• رجل4 من غير ما أحس … مديت ايديا ومسحتها ..
• رجل5: ما كنش همى أمسح دموعها …..
• رجل6 كان كل همى أبوس خدودها ولو بايدى …
• رجل1 لا والمصيبة .. مسكت ايديا ….
• رجل2 حضنتنى بعيونها وقالت ….
• امرأة2 سنة طويلة عدت عليا باحلم تقولها …. إيه أخرك ..؟
• المؤلف ما أنا كنت خايف أكون لوحدى اللى حاسس…..

• امرأة 2 ياعمر عمرى…الحب عمره ما يتولد جوا قلب … ناحية حد
إلا ولازم يتولد وقتها فى القلب التانى ولو نبضة واحدة…
• المؤلف طب أجيلكم إمتى ..؟
• امراة2 وقت ما تختار..
• المؤلف الساعة تمانية….
• امرأة2: وأوعاك تتأخر …

(زغرودة عالية تنطلق …. ليجلس المؤلف … داخل بؤرة
ضوء… ليعم الظلام من خلفه … و يدور حوله الجميع .. )

• رجل1 انت اللى جاى تتقدم لبنتى ….؟
• رجل2 مهنتك ..؟
• المؤلف موظف معاها …
• رجل3 مُـرتبك ..؟
• المؤلف يزيد عنها شوية…
• رجل4 و شقتك .. ؟
• المؤلف لسه هاجيبها …
• رجل5 هاتجيبها فين …؟
• رجل6 و فلوسها فين …؟
• المؤلف هاتصرف فيها …
• رجل1 طب و الموبليا…؟
• رجل2 و الفرح؟
• رجل3 و العيال؟
• امراْة1 و الدهب.؟
• امراْة2 و المعاش.؟
• الجميع كل ده… هاتجيبه امتى .. ياله بره .. لما تجهز تبقى تيجى…

(يتحرك المؤلف … لاْمراْة2.. )

• المؤلف سامحينى….انا لازم أمشى..
• امراْة2 طب و انا …. إزاى تسيبنى …
• المؤلف انا يـمكن ابعد … بس قلبى سايبه عندك …
• امراْة2 طب و قلبى اللى ياما حبك ….
• المؤلف لازم أبعد قبل حبه ما ينقلب ليا كُــره …
• امرأة2 اللى حب عمره ما يكره…
• المؤلف الفقر و الحرمان بيزرعوا جوا القلب كره.
• امرأة2 لازم تحارب…لازم تدافع عن حبنا…
• المؤلف انا لازم أمشى .. لازم أبعد …
• امرأة2 ليه تبيعنى …. ليه بـتـهرب …
• المؤلف عشان بحبك …. صدقينى عشان بحبك …

( وتتكرر نفس الجمله .. ولكن من مواقع أخرى كثيره … فى أماكن مختلفه …. للعديد من الأشخاص …..)

• الرجال الثلاثه صدقينى عشان بحبك …..
• إمرأه 1 ( أمام رجل 1 ) علشان بتحبنى تسيبنى و تسافر …
• رجل 2 ( أمام إمرأه 2 ) كفايانا سلف و ديون …
• إمرأه 3 ( أمام رجل 3 ) طول ما حسك فى الدنيا كل الديون تهون ..
• رجل 1 و أنا وشى بقى خلاص فى الآرض …
• إمرأه 2 مسيرها تتــعــدل فى يوم …
• رجل 4 ( أمام رجل 5 بلهجه صعيديه ) تتعدل ميتى يارجل … دا كل
يوم عن يوم بتسوء …
• رجل 6 ( يجلس أرضا يكتب خطاب ) و أنا كمان يا أمى حالتى بقت
بقت بتسوء … أنا ….
• رجل 1 أنا مش عاوز ولادنا يشوفوا الذل اللى شوفته …
• أمرأه 1 بس ولادك محتاجينك جنبهم …
• رجل 2 و أخواتى البنات محتاجين اللى يجهزهم ..
• رجل 3 لما اسافر هاعرف أزاى أجهزك

( يبتعد عنها .. ليصبح بمفرده ..
تعود الإضاءه عاليه … يتجمعون حوله ..)

• رجل 1 عشان بتحب … تسيب وتهرب ….
• إمرأه1 مش أحسن م اللى بيسيب حبيبته من غير سبب إلا رعبه ..
• رجل1 قصدك إيه ..؟
• أمرأه1 قصدى إنت عارفه … ولا نسيت …؟
(و على الجانب الآخر … تتحرك إمرأه 2 لرجل 4 )
• إمرأه2 نسيت لما كنا بنحب بعض …
• أمرأه1 كنت راجل …. مش أى راجل ….
• إمرأه2 تقول للظلم لأ …. والحق ترجعه …
• أمرأه1 كان صوت الحق صوتك .. ودايما ترفعه ….
• الأثنتان مره واحده … هى مره ….
( فى الخلف … يقوم كل إثنان بإمساك الثالث .. و تقييده ..
مع القيام بتعذيبهما بشتى الوسائل ….)
• إمرأه2 وما ظهرش صوت …
• إمرأه1 و كأنه مات …
• إمرأه2 إيه غيرك ….؟
• رجل1 غيرنى ليل مالوش نهار …
• رجل4 غيرنى بير مالوش قرار …
• رجل1 غيرنى ظلم ما شوفت زيه …
• الأثنان غيرنى ظلم … وذل … و مرار …
• إمرأه1 تقوم تبيعنى …
• رجل1 باعونى قبلك من غير تمن ….
• أمرأه2 إوعى تضعف …
• رجل4 أنا إنكسرت وصعب أعود …
• أمرأه1 عندك حلمك …
• رجل1 قتلوه وهو لسه وليد ….
• إمرأه2 عند عمرك …
• رجل4 ماعيشتش ولا لحظه فيه …
• الإثنتان عنك بكره …
• الإثنان بكره مات …. مات وإتقتل فى زمن العبيد …
• الإثنتان إرجع أصرخ … وعلى صوتك … وإياك ..إياك تموت .
• رجل1 ماأنا ياما صرخت بعلو صوتى ….
• رجل4 ماردش عليا غير الصدى …
• الإثنان وحتى الصدى لما رجعلى … ما عرفتهوش …
• إمرأه1 أنا محتجاك …. محتاجه قلبك …
• أمرأه2 محتاجه حبك ….
• الإثنتان صدقنى … غيرك ماليش ….

( تتحرك إمرأه 1 لرجل 1 )

• إمرأه1 هات أيديك …. ( يمد يده لها …)
( تجذب إمرأه 2 رجل 4 )
• أمرأه2 أرفع راسك لفوق …. فوق فى السما …
• إمرأه1 بص بعينيك هتلاقى بكره …
• الإثنتان ياله …. قوم ….

( يتحرك الأربعه .. ولكن ..يقابلهم رجل 2 ورجل 5 )
• رجل2 رايحين فين …؟
• رجل1 هاتجوزها …
( يتحرك رجل 5 أمام أمرأه2 ورجل 4 )
• رجل5 تتجوزها …. إنت …؟
• رجل4 أيوه … إتفقنا على كده .. هى .. و.. أنا …
• رجل2 إنت آخر إنسان ينفع لها ….
• رجل1 أنا أكتر إنسان بيحبها … وهلى كمان بتحبنى ..
• رجل2 ( لرجل1) بتعطف عليك …
• رجل5 ( لرجل4) شفقه يعنى …
• رجل 2و5 إنما يوم ما تحب .. هاتحبنى أنا ..
• رجل1 نسألها طيب …
• رجل2 من غير مانسأل …
• رجل5 أنا قلت ليا …
• رجل2 يعنى ليا ….

• رجل4 من غير مايبقى بينكم حب …؟
• رجل5 أنا ما يهمنيش اللى إسمه حب ..
• رجل1 يبقى عمرك ماهاتملك فى يوم قلبها …
• رجل2 يوم ما أمتلكها …. يبقى أمتلكتها كلها .. وكمان قلبها ..

• رجل1 مِـلك .. مِـلك … إنت إيه …؟
• رجل 2 أنا اللى عاوزه باملكه …
• رجل5 واللى يعارضنى ….
• الإثنان هـــافرمــــــه …
• رجل1 ( خاضعا) خلاص … يمكن معاك هاتبقى أسعد من معايا ..

( وهنا يتدخل رجل 3 .. ورجل 6 ……)

• رجل3 إيه هو خلاص …. ماتدافع عن حبك ….
• رجل1 يمكن يسعدها …
• رجل6 ( لرجل4) ما أنت عارف إنها مابتحبهوش …
• رجل4 أيوه عارف … بس هى لسه ما تعرفوش …
• الإثنان صحيح جبان ….. ( للآخران ) طب أسمع بقى …
• رجل6 لو هو سابها …
• رجل3 راح أخدها منه ….
• رجل2 (لرجل3) إجرى ياشاطر … إلعب بعيد …
• رجل6 ( لرجل5) الكلام ده تقولهوله هو …(يشيرعلى4)
• رجل3 أنما أنا ….. مش هاتقدر عليا ….

• أمرأه1 إنتوا مالكم …. جرى لكم إيه …؟
• رجل2 سيبك منهم … ياله بينا …
• رجل3 ياله فين …
• رجل5 وإنت مالك …
• رجل6 أنا مش هاسيبها …
• رجل2 يبقى هاتضيع حياتك ….
• رجل3 حياتى قبلها حياتك ….
• رجل 2 طب ياله بقى من طريقى …

( يدفع رجل 2و5 رجل 3و6 … بينما 1و4 فى حالة مشاهده)

• رجل1 ( ممسكا بيد أمرأه1بقوه ) ياله معايا …
• رجل6 (يمسك يد أمرأه 2) لأ معايا …
• رجل2 سيبها أحسنلك ….
• رجل3 مش هاسيب …. سيبها إنت ….
• رجل2 يبقى دا آخر يوم فى عمرك …

( يجذب 2و5 مكن اليد اليمنى …
و 3 و6 من اليد اليسرى ….
ولا زال 1 و4 فى حالة إنكماش …)

• أمرأه1 ( لرجل 1) ألحقنى ….. أتحرك ….
• أمرأه2 ( لرجل 4 ) أبوس أيدك أتحرك ….
• أمرأه1 دانا شرفك يابنى أدم … قوم …
• الإثنتان إلحقنى …. قوم … إتحرك ….
• رجل2 ( يجر إمرأه 1 ) ياله قدامى ….
• رجل6 وأنا مش هاسيبها ….
• رجل5 ولا هاتاخدها ….
• رجل3 يبقى دا موتك ….
• رجل2 لأ دا موتك ويا موتها …..

( وهنا … يتحرك رجلان 1و4 فى محاول للتدخل )

• رجل1 أوعوا … سيبوها …..
• رجل4 أبوس أيديكم … أوعوا تأذوها …

( و يتجاذب الجميع …..
كل فرد يحاول جذب إمرأة إليه … من يدها .. من ملابسها إن لم يتمكن أن يمسك يدها … وكل واحده تستنجد .. تصرخ .. وفجأه .. تتدوى صرخه .. تتمزق الملابس … تتناثر كل قطعه فى يد كل فرد .. الكل سواسيه .. من كان يحب .. ومن كان يدافع .. ومن كان يريد أن يسرق .. الكل سواسيه …
بعدها … يتفرق الرجال تاركين النساء فى حالة إنهيار ..)

• رجل2 ( يمسح فمه كمن أنتهى من ألتهام طعامه )
مش قلتلك …. اللى عاوزه هاخده ….

• رجل3 ( يلملم ملابسه .. يتنباهى أمام رجل 5 دون إهتمام بالمرأه)
زىّ .. زيك …. ولا كنت عاوزها ليك لوحدك …

• رجل1 ( يتحرك بعيدا عنها فى إنكسار )
سامحينى ….. حاولت أحميكى … ماقدرتش ..
• إمرأه1 و دلوقتى … بقيت لوحدى …
• رجل1 ( متهربا ) قصدك إيه …؟؟
• أمرأه2 ( لرجل 4) حبيتنى يوم …. مش كده …
• رجل4 أيوه … لكن …..
• أمرأه1 أنا أهه …. ملكك …. خدنى معاك … ليك لوحدك ..
• رجل1 أزاى مش هاقدر …
• أمرأه2 أنا أهه … قدامك … ملكك …
• رجل1 على كل حته فى جسمك شايف إيديهم …
• أمرأه1 بصمات إيديك برضه بين إيديهم …
• رجل4 ما كانش قصدى …
• أمرأه2 طب خدنى … طهرنى …
• رجل1 أنهار الدنيا عمرها ما تطهر خطاياهم …
• أمرأه1 أنهار الدنيا عمرها ماتطهرك إنت … إنت أوطاهم …
• رجل1 وإنت أكبر ذنب فى عمرى …
• الأثنتان وهافضل ذنبك . هافضل عجزك ويا خوفك طول مانا عايشه.
• الرجلان يبقى تموتى … أيوه تموتى … يمكن أنسى …..

( يهجم الرجلان على المرأتان … يهمان بخنقيهما …
وهنا …. يقفز المؤلف … فى جنون …..)

• المؤلف بس … بس … كفايه .. إنتوا إيه … سفاحين … مجرمين …
مستحيل تكونوا بشر ….

( يتجمعون حوله … )

• رجل1 ايه يا عم .. انت اندمجت و لا ايه ..؟
• امرأة1 كل شوية تندمج فى الحكاية ..
• الجميع أصحى بقى .. فوق .
• المؤلف قصدوكوا ايه .. ؟؟

• الجميع ما أحنا قولنا من البدايه .. إحنا ايه ……
إحنا مجرد ورق … ورق عليـه انكتب ….
انكتب دور كل واحد فينا … ولا أختارنا حتى أسامينا..
ولا قولنا ايه… ولا هانعمل ايه…

• المؤلف لكن أنتوا قدامى بشر… أهه…. شايفكم… لامسكم ….
لحم و دم …
• الجميع يا عم صدقنا … احنا شوية أسامى فى ورق ….
أسامى و انكتب علينا نتوجع …. عمركش جربت الوجع ..
• رجل1 لما تخاف أنك تخلف… و تجيب ولد …. ولا بنت حلوة تخلى
قلبك يتسعد …
• المؤلف وأخاف ليه … إنى أجيب بنت و لا ولد ….؟؟

( تتحرك إمرأه 1 … الى رجل 1… فى بؤرة ضوء … بينما
يقف الباقون فى الخلف .. فى إضاءة خافته )

• امرأة1 (الرجل1) الواد دفيان وحرارته مش عاوزة تنزل …
• رجل1 (فى تحرج) إديله حباية أسبرين ….
• أمراة1 إديت له بدل الواحدة أتنين …
• رجل1 طب كمادات …
• امرأة1 بتنزل نار من على دماغه ….
• رجل1 طب وبعدين ….. ايه العمل ….
• امرأة 1 الواد ضعيف … وها يروح مننا …..
• الجميع الواد ها يروح مننا …
• رجل1 أما ابن كلب …. يعنى كان لازم يعيا أخر الشهر….
• امرأة1 الواد ها يروح مننا….
• رجل1 وانا أعمل ايه..؟
• امرأة1 خده لدكتور….
• رجل1 الكشف والعلاج ها يعدوا ميه…
• امرأة1 ابنك ياراجل….
• رجل1 يعنى أطلع فى الشارع وأمد ايديه
• امرأة1 ابنك ياراجل….
• رجل1 الصبح ها طلع بيه ع الوحدة الصحية …
• امرأة1 ابنك ياراجل….
• رجل1 أنا ابن كلب إنى إتجوزت وخلفت ياستى …….
• الجميع إبنك ياراجل……
• رجل1 راجل ايه بقى … ما خلاص … طلعت وليه …

(وعلى الجانب الاّخر تقف امرأة 2 .. يلتف حولها الجميع .. )

• امرأة2 ابنى يا عالم … الولد هايروح منى …
• رجل2 ما تخافيش ….. عملنا له غسيل معدة ..
• أمرأة2 و حالته إيــه …؟
• رجل3 الحالة دلوقتى مستقرة ..
• رجل4 بس فيه مشكلة و لازم نصارحك بيها ..
• أمرأة2 إبنى حبيبى … ما له .
• رجل5 الحقيقة .. المشكلة… هى وزنه..
• امرأة2 دا اكلته حتى خفيفة …
• رجل6 المشكله ان وزنه زاد…..
• رجل5 20- 30 كيلو ….
• امرأة2 و العمل….العمل أيه…؟
• رجل1 هنا فى بلدنا ما فيش امان…
• رجل2 انصحك تسافرى بره…
• رجل3 هناك رعاية اخر تمام…
• امرأة2 تصدق… و أهى فرصة …
• الجميع: فرصة لإيــــــه….؟
• امرأة2 انى أعمل حبة تجميل….؟

(أظلام تام إلا على المؤلف)

• المؤلف انتوا عاوزين تقولوا ايه ..؟
• الجميع لا ياعم … وإحنا مالنا ….
• المؤلف و أنتوا مالكم أزاى …. دا اْنتوا عارفين كل حاجة ….
• الجميع ماتصدقش …. إجنا يا سيدى ورق … مجرد ورق …. ورق
ومكتوب علينا كلام .. واللى يدفع يشترينا .. أى منتج ..
و لا مخرج .. ولا تاجر لحمه ومعاه الفلوس …
• رجل1 ومش إحنا وبس …
• رجل2 ( مشيرا على الجالسين) لامؤاخذه … و حضارتكم كمان ..

• الجميع مجرد ورق … ورق وعليه إنكتب .. أسامى ناس .. بتنداس كل
يوم … يتنباع … واللى يدفع يشترى .. واللى مايشترى يتفرج.

( يتحرك كل فرد فى مواجدهة كل فرد من الجمهور )

• رجل1 أيوه يا أستاذ … أيوه يابيه … مين عاوز يبيع ….
• رجل 2 إنت …
• رجل3 ولا إنت …
• أمرأه1 ولا إنت …..
• الجميع أيوه أنت … إنت ياللى مكسوف ترفع أيدك … ياله قول …
تمنك إيه ….

• رجل4 ها …. تمنك كام …. أنا بشترى بأعلى سعر أى صوت ..
• رجل5 أيوه .. أيوه .. مين يصوت … دا صوتك عندى بميت جنيه ..
• رجل6 (بقوه)صوتك أمانه يامواطن .. إياك تبيعه بأقل من ميتين جنيه..
• إمرأه1 ومش بس صوتك …. أنا هاشترى منك سكوتك ..
• إمرأه2 سكوتك ع اللى سرق …
• إمرأه3 واللى نهب …
• الجميع واللى باع كل البلد …
• إمرأه1 وأنا هاشترى منك عينيك …
• إمرأه2 غمضهم … وأوعى تبص حواليك ..
• إمرأه3 لا مين اللى شال … ولا إيه اللى مال ..

• الجميع وإن لحظه شوفت .. تمنك هايرخص .. ولا تلاقى مين يشتريك.

• رجل ياله بسرعه … فتح عقلك … فتح مخك …
• الجميع إفتح درجك …. و بسرعه قول … تمنك كام ….
• رجل2 ها …. مين عاوز يسافر الخليج …. تمنه عندى ميتين ريال …
• المؤلف واللى عاوز يبع ضميره ….
• الجميع إيـــــــه ….؟؟؟؟ يبيع إيه ….؟؟؟؟
• المؤلف يبيع ضميره ….

• الجميع ييه …. عندنا منه فى المخزن كتير …. لحد أما عفن … لحد
أما نتن .. مالكل باع من زمان .. وخلاص .. ماعادلوش تمن …
• المؤلف أنتوا إيه … شوية أبالسه ….
• الجميع أحنا وإنت والسامعين شوية ورق … ورق وخلوه هردبيس ..

( يدور الجميع .. فى خطوط متشابكه .. متقاطعه .. بينما يقوم
المؤلف بجمع شتات أوراق الروايه التى تطايرت فى البدايه)

• إمرأه1 تماثيل وماشيه فى الشوارع تايهه … ماهى هردابيس ..
• رجل1 القوى داس الضعيف بالجزم … ماهى هردابيس..
• رجل2 الحرامى هو الشريف .. ماهى هردبيس …
• إمرأه2 الفقر و الغنى والكراسى وراثه … ماهى هردابيس ..
• رجل3 أحلام كتير و ماتت قبل ماتتولد .. ماهى هردابيس ..
• رجل4 حرب دايره فى كل ناحيه .. والكل فى ناحيه .. ماهى هردبيس..
• رجل5 بنوا الجدار .. عملوا الحصار .. قتلوا الصغار .. والكل فار ..
ماهى هردابيس …
• رجل6 دنيا دى ولا غابه .. ودول ديابه .. سيبك .. ماهى هردابيس.
• أمرأه3 عراق .. لبنان ..صومال .. سودان .. فلسطين …
والدور على مين يا نايمين .. ماهى هردابيس …
• المؤلف وفى زمن الهردبيس ياساده … على جميع الأفراد .. يبقوا ورق.
( ينثر أوراق الروايه فوق الرؤس … لينضم بين الجميع ..
و يخرجون مثلما دخلوا …. )
** النهايه **

اظهر المزيد

مقالات ذات صلة

تعليق واحد

  1. وافــــــــــــــــــر الـشــكـــر و الــتـــحــيـــه و الــتــقــديــــر
    لأســـرة تــحــريــــر ( المسرح نيوز ) عـلـى إهـتـمـامـهـم و جـهـدهــم
    مــع كــل الأمـنـيــات بالـتــقـدم و الأنــتــشـــار
    .
    ناجى عبدالله
    .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق