حصريا.. ننشر نص مسرحية “تركة امرأة مجهولة” للكاتب: محمد اسماعيل القناوى

المسرح نيوز ـ القاهرة | نصوص

ـ

مسرحية

تركة امرأة مجهولة

تأليف

محمد اسماعيل القناوى

 

الشخصيات

  • صابر
  • سالم
  • رجب
  • زينب

الـديـــكـور

المسرح مستويان

المستوى الأعلى يُصعد إليه بدرجتي سلم..

في المواجهة إطار مذهب به صورة لامرأة وطفلة وكلب غير واضحي الملامح (flaw) يوجد بعض الملابس والأثاث البسيط في احد الجوانب بالمستوي الأسفل يستخدم أثناء الأحداث

بارا لوج

نسمع صوت الجميع، ونراهم كأشباح تحت الضوء الخافت.

الجميع             صوت يلهمنا أن نحيا…. أن نسكن معنى الكون

                     زمان يلهب كل ضمائرنا كي نبقى اعمدة تحمل هذا الكون.

صغاراً عاراٌٌ أن نلعب

علينا أن نلبس ثوباَ اكبر

او نكبر فى غفوة ونلامسك يا أتون الشمس

                    إما أن نسجن، نوأد، أو ينسى الكل أسماء الكل

                     (تضاء بؤرة على الإطار)

الجميع             ونلاقى أجدادا كانوا. . . نترحم ثم إلى الخلف نعود

صابر              ما كان لك يا جد الأيام كان بعد طفولة أعوام.

سالم               وأنا إنسان. . أحبو، أصبو، أصبح شابا

رجب              أمنحنى الفرصة يا أبت أن انشأ مثلك

زينب              ألهو العب أتعلم أجد أكد.

الجميع             نشقى في سن الجهد كي نصنع مجدا مثلك

                    (تخفت الإضاءة)

اللوحة الأولى

يضاء على الجميع وهم فى المستوى الأسفل للمسرح، يرتدى كل منهم ثوباَ من عصر مختلف عن الأخر. بعد فترة صمت يصعدون للمستوى الأعلى ويجلسون على شكل قوس. يلازمهم فى هذه الأثناء صوت ربابة وأرغول فى لحن خزين

رجب               على كل حال مفيش مانع

صابر              أنا أمانع

سالم               كلام فاضي. . وهم

                    (صمــــــــت)

زينب               الله يرحمها، كانت متوقعة كل ده، مش عارفه ليه حوشت ده كله؟ لمين؟خلاص، صمـــت)

رجب               خلاص، نراجع الموقف مرة ثانيه

صابر              مرة ثانيه . . أنا أعارض

سالم               كلام فاضي. . . وهم

                    (صمــــــــت)

زينب               الله يلعنها . . هي كانت بتحوش كل ده لينا ؟ قصدها أيه ؟ . . ماصرفتش ليه على نفسها ؟ ! هى مش كانت عايزة تحج ؟ . . .

                    (صمــــــــت)

رجب               على كل حال اللى عايز يعمل حاجة يعملها

                    (ينزل  الى المستوى الاسفل)

صابر              غصب عنك و عن اى حد ، كل واحد حر

سالم               كلام فاضى . . . وهم

                    (صمــــــــت)

زينب               غارت فى دهية . . . الله يرحمها . . . هى ما صرفتش ليه على نفسها ؟ هى مش كانت عايزة تشد جلدها فى فرنسا؟

                    (صمــــــــت)

رجب               الله يحرقكم كلكم… فيه ايه ..ما حدش عا جبه كلامى  ليه؟

صابر              “ينزل لاسفل المسرح”

                    احنا مش مضطرين نعجب بكلامك

سالم               كلام فاضى..هراء… عبث… وهم”صمت”

زينب               “تنزل للمستوى الاسفل”

                    تفتكروا هى سابت التركة دى كلها ليه؟

صابر              هى جابت الفلوس دى كلها منين؟

رجب               كسبت فى جوايز البسكويت

سالم               كلام..

زينب               (تقاطعه)

                    فاضى..المهم انها سابت التركة

رجب               لينا

زينب               الاهم..ليه؟

سالم               كلام فاضى..وهم

صابر              ماتقرفناش بقى وهات جديد يا تسكت

رجب               ايه هو الكلام الفاضى ؟

زينب               ايه هو الوهم ؟

سالم               انا حر . . .؟ (لحظة صمت) . . . كلام فاضى .

رجب               احنا احرار .

سالم               وهم . . . (صمــــــــت) ليدى مكبث والساحرات كلهم اجتمعوا فى ورقة فلوسكاب  مكتوب عليها اللى يقدر على الثانى يخونه . . . ويقتله (صمــــــــت) عشان بعض الاوراق المعتمده لدى المصارف (صمــــــــت) بس مين اللى يجيلو الوسواس القهرى مين اللى هيشوف الدم فى ايده مايتغسلش ابدا  (صمــــــــت) كلام فاضى . . وهم .

رجب               كلام فاضى . . .

صابر              وهـــــــم … …

زينب               عبث

                    (تخفت الاضاءة تدريجياَ حتى الاظلام التام )

الوحة الثانية

يضاء على الصورة وسالم فى المستوى الاعلى للمسرح مع صوت الموسيقى المنبعث من الربابة والارغول ، ثم يضاء اسفل المسرح

 صابر               احلام العاشق اوراق الفل

رجب                ايام الغادر لا تعرف كيف تحب

زينب                الصوت القادم من الزمن السحيق يتلو علينا أن نحب كما احب الكل

(الثلاثة)             كيف واين ومن نحب؟

صابر                انحب حقداَ؟

رجب                ام كيداَ؟

زينب                ام نقتل بإسم الحب؟

الثلاثة               كيف..كيف نحب؟

                      (تخفت الاضاءة على المستوى الاسفل وتبقى بؤرة على سالم والصورة فى  المستوى الاعلى وسالم  يخاطب الصورة..)

سالم                 مولاتى…تحياتى ، ابعث إليك من هذا الجحيم الساكن الى ميعاد ..كل لعناتى… حتى تلتهبين هناك حيث السعير. . . أتظنى اننى لااتذكرك ؟ انا لم ولن انساك ابداَ فكلانا رائد من رواد جهنم ، وانت تعلمين أن الغلبة لى . اما هم (يشير الى باقى المجموعة الموجودين فى اضاءة خافتة فى المستوى الاسفل فى “فكس كدر”)فمسرحاَ لاستعراض ما بداخلى من شيطان . .  ولجلب الشفقة عليهم . . لكن اسمحى لى ياسيدة البغاء يا مليكة العهر أن احرمهم هذه الشفقة ، وسأذيع عليهم من انت ومن انا ومن هم . . . وحينئذ اراقص النار على موسيقى النصر .  . . . ( تعزف موسيقى النصر لفردى  لحظة صمت ثم يضاء المستوى الاسفل على الجميع وهم يرتدون ملابس الستينيات)

رجب                فات اكثر من نص قرن واحنا مش عارفين مين الست دي وليه وصت لنا بالتركة دى كلها . . .

صابر                ليه؟عايزين نعرف ليه ؟

زينب                لازم نعرف . . . عشان نعرف ‍‍‍‍‍

سالم                 (وهو يصعد الى اعلى) انا اعرفكم

الثلاثة               ( معا وهم يصعدون اليه) انت عارف؟

‍سالم                 أن ماكنتش انا اعرف يبقى مين اللى يعرف ؟ رجب ابن شيخ الكتاب؟

زينب                انت بتخرف بتقول إية ؟

صابر                انا عرفت يا زينب

زينب                جرى إيه يا صابر ياابن زكية بتاعت الجاز؟

رجب                ايوة صابر يا زينب يا بنت ام محمد الدلالة

سالم                 ، انما هى الله يرحمها…( لحظة صمت نسمع خلالها موسيقى منبعثة من الارغول والربابة )نبيلة بنت سيد السكران… فاكرينها؟

صابر                زى ما فكرينك…سالم…

رجب                البلطجى

زينب                ابن محمد نصر…اللى…

سالم                 (يقاطعها) بمزاجها مش غصب عنها… انما انتو اللى فضحتوها وضربتوها …( ينزلون جميعاَالى المستوى الاسفل ، يرتدى رجب ملابس الشيخ غريب,زينب ترتدى زى فتاة من حى شعبى يكشف مفاتنها ،صابريلبس ملابس شاب جامعى فى الستينات،سالم يرتدى ملابس بلطجى فى حى شعبى)

الشيخ غريب        ( يسترالفتاة بعباءتة)

سالم                 اخطب بقى وقول اللى انت عايزه

صابر                يتجلدوا

الشيخ غريب        لا…يستتابا ويتزوجا

سالم                 ( وهو يهرب الى اعلى ) أنا حر مش من حق حد يغصبنى على حاجة . .

صابر                هرب . . طول عمره ندل .

 سالم                هكذا،سيبدو كل شئ جلى…. كل شئ….

                    وتعاد زيارة السيدةالعجوز ولكنها فى وصية بتركة عفنة او ربما لا تحصى…

                    ( يضاء المستوى الاعلى على الجميع)

زينب               انا حبيتك .. وحبيتها لكن انتو خونتونى…

رجب               انا كرهتك وكرهتها…

سالم               خلاص سيبوا التركة الشؤم دى وامشوا وانا اخدها

صابر              انا فاهمك قوي يا جدع انت،ومش هانسى أبداَ الدم اللى ساح من نفوخى اول رمضان واناصايم وانت بتلعب قمار .

سالم               فاشيست ، بطل بقى كلام الشيخ ابو رجب . . الشيخ مات . . مات

زينب               ملحد..قذر…

سالم               عنصرية متخلفة

رجب               محدش يناقشة

سالم               اسمعوا, عشان نخلص الليلة دى ونشطب الفرح…الله يرحمها لمت التركة دىمن حرفة وتجارة عالمية…. بس مش اى حرفةولا من اى تجارة تحبوا تشوفوا ادوات الحرفة؟… بس للاسف مش حاقدر اوريكم كل الادوات… ولا حتى رأس المال….

صابر              دى محاضرة فى البرجوازيةبقى….

سالم               أناآسف…الهانم كانت قوادة وبغى…آسف مرة تانية…هى كانت بغى وبعدين بقت قوادةاصلها” على راى المثل” تابت…

زينب               كداب ..انت عايز تشككنا فى اصل التركة عشان نسيبهالك ونمشى…

صابر              شوف…رغم انى متأكد انك كداب ابن كداب لكن تقدر تقولى مين البنت اللى فى الصورة معاها؟

سالم               البنت دى بنتى انا

رجب               إيه دليلك؟

سالم               مكتوبة بإ سمى …وادى…( يبحث فى ملابسه،مستدركا) انتو مين اساسا انا معرفكوش

زينب               تعرف اللي فى الصورة؟

سالم               ……..

رجب               تقربلك؟

سالم               …….

صابر              انت مين ؟

سالم               …….

                    (تخفت الاضاءة تدريجياَ حتى الاظلام التام)

اللوحة الثالثة

( يضاء المسرح فنسمع صوت الجميع ونراهم كأشباح تحت الضوء الخافت )

الجميع            صوت يلهمنا أن نحيا أن نسكن داخل معنى الكون وزمان يلهب كل ضمائرنا كي نبقى اعمدة تحمل هذا الكون .

سالم               معروف عنوان الارض فى هوية هذا الكون .

صابر              لكن مجهول انت اذ ترضى نسيان الوقت .

رجب              مجبور أن تحمل اسماء لاتذكر منها اى كيان .

زينب              مهدور حقك لو تطلب أن تسقط من ذاكرة الاحداث

                    ( صمت ، موسيقى من الأرغول والربابة ثم تضاء بؤرة على صابر والصورة )

 صابر             اظننى اعرفكِ . . أذكر الايام التى لم تهدأ داخلى وتلك الثورات التى لم تخمد فى عقلى . . كنتُ أيام ذلك اليسارى . . . ( صمت ) . . هل تحسبيننى قد نسيت ماضيكِ ؟ أنه حياتى ( يشير الى الكلب الذى فى الصورة) وهذا الكلب أذكره جيدا . . انه سميركِ الوحيد لأنه وفىٌ بطبعه . . اللعنة عليكِ حيث أنت حتى لو كنتِ قد متِ قديسه. . ملعونة فى كل ايام السنة وفى كل لحظات اليوم  . . .هل تظنين أنكِ نجحتِ فيما تريدين ؟ وأنا .. ما كنت الابضع لحظات فى حياتكِ . . لكن . . سأذكركِ لهم، وسأذكرهم بكِ وحينها . . لن ابتئس حتى إذا مت يهوذا . .

                    ( صمت طويل تنظر خلاله زينب فى وجه سالم )

سالم               ( ينظر لزينب فى ارتياب ثم ينظر الى الصورة)

زينب              ( تهرب منه وتقترب من رجب وتنظر له بأرتياب)

رجب              ( يحاول الهرب منها)

زينب              ( تحاصره بنظراتها)

سالم               ( يقترب من زينب وينظر فى وجهها ثم ينظر الى الصورة . . )

رجب              ( يلاحظ ما يقصده سالم ويقترب من زينب وينظر فى وجهها ثم ينظر الى الصورة . . )

زينب              ( تقطع هذا الحصار وتهرب الى المستوى الاعلى صارخة ) . . خلاص . . محدش قادر يعرف مين الست دى وعايزة ايه ؟

صابر              مليون سنة عدت عليكو وانتوا لسة بتسألوا نفس السؤال . . مين الست دى ؟ لو كل واحد فيكم شغل عقله شوية حيعرفها ،

   ( يصعد سالم الى المستوى الاعلى )

سالم               نسوان الدنيا كلهم كوم والولية دى لوحدها كوم

                    ( ينظر الى زينب . . ثم يصعد رجب الى المستوى الاعلى)

رجب              هى مين يعنى ؟ كليوباترا بجلالة قدرها قهرها راجل واحد ولسة دموعها مغرقه البحر . . .

زينب              كليوباترا ماقهرهاش راجل انما الحرب والسياسة هي اللي قهرتها لما قدمت للعالم كله الحب . . قدملها راجل دموى الخيانة والاسر

سالم               تفتكروا الفرنساوية غسلوا دم الثورة من شوارع باريس ؟

رجب              ولا منظفات الدنيا كلها تنظفها .

صابر              المرة دى جننتكم ..

زينب              تركتها . . . ( صمت ) . . ليه ؟ آخر مرة سافرت واشنطون تشترى شريط روك وبعد كده راحت موسكو اشترت كفنها . . مايوه احمر بكينى . . ورجعت هنا كتبت الوصية الشؤم دى..

                    ( صمـــــــــــــــــــت)

   صابر           كان يوم مختلف عن كل الايام اللى عشتها لحد دلوقتى يوم احتفال الحزب بمرور 100 سنة على تأسيسه (“فلاش باك” نرى احتفال ومجموعة من الناس يرقصون بينهم زينب ترقص مع كل الشباب الموجود بينما نلمح صابر فى مكان جانبى يكلم احداً لا نراه ، يبدو الجميع كاشباح ، بينما سالم ينزل الى المستوى الاسفل يخاطب صابر )

سالم               (بسخرية)ايوه .. انا فاكر ياعادل .. كان من نص ساعة هه هه

صابر              طظ .. مش مهم من امتي .. مش هو ده الموضوع .

                    (“يعود الفلاش باك ” زينب تقرأ قصيدة  والجميع يسمعها)

زينب              ياحاضر ماضى اسمائى

                    ياليلى الداكن . ياصبحى الباسم .

                    يا احلى سكين دامى

                    مزق احشائى واعضائى

                    يا عود اخضر مبتعد عنى

                    او ليت منى تتدانى

                    وسأصنع منى جذور

                    وسأجعل أن شئتى ماءاً من كل عروقى

                    وسأطحن قمحا من عظمى

                    وسأرسل قلبى الى الماضى كي يأتى يسعى لذكراكِ.

                    كي ارسم بسمات فوق شفاكِ

                    وان يعجز قلبى عن الارسال

                    سأبتر اغلى ما عندى فداكِ

                    وسأنحر يامصر قلبى فوق طور سيناكِ.

                    ( سالم يقطع حالة الفلاش باك )

سالم               انا مستغرب ايه اللى فكرك بموضوع قديم زى احتفال الحزب بمرور ست اشهر على تأسيسه مع انه كان من عشرين سنة

زينب              (لصابر) مُصرليه على الموضوع ده . . يومها كنا مبسوطين ، فرحانين واحنا فى موقف ما ينفعش فيه الفرح . . الفرح دا موضة قديمة ( صمت وسكون للحظات) زى كل الذكريات. . . ايام الفرحة والرقص والشعر كانت ايام جميله كنت انا وسوسن. . . (يلتفت اليها الجميع ويقف المشهد للحظات مع صوت الربابة والارغول) سوسن ؟ (تنظر تجاه الصورة ) أيوه . . هى سوسن انت فاكر ؟

صابر              أيوه. . هيه.

سالم               سوسن !؟

رجب              ( يتذكر شئ ما) المعتقل. . رقصةالمعتقل فاكرين ؟ يوم بليلة حفلة من اجل تصحيح واحياء الثورة ويدوب بداية اول رقصة وكنا كلنا فى علبة صفيح ضلمة انتهت بينا الى ممر طويل اتصفينا فيه وجم خدوا كل اللى فى جيوبنا ودخلنا غرف ضيقة ضلمة. . فاكرين ؟ لو فاكرين الحفلة والرقصة فاكرين كانت فين ؟ فى القصر الكبير اللى اتأمم وسكن فيه السيد العظيم اللى مكناش نعرف شغله ايه بالضبط, لحد ما بدأ يحقق معانا

زينب              مالهاش ذنب

صابر              ذنب. . ؟ أمال مين ؟

زينب              قصدك ايه ؟

سالم               الحدق يفهم

صابر              لما انت تكونى صحبتها هى تبقي ايه ؟

سالم               واحده بتبيع . . .

زينب              ( تقاطعه وهى تبكى بشده)انا عمرى ماكنت سلعه ولا ببيع مشاعرى ، وحتى لو كنت ده مايمنعش انى بحب الوطن ده واحساسى بالذنب ناحيته مش راضى يفارقنى . . . ولو انا كنت من الادوات اللى استخدموها فى بيع الوطن سوسن بريئه ابوها هو اللى باع .

رجب              (صارخا) مِرات رئيس القلم السياسى بريئه .. ؟ ها

صابر              ديه ست اجتمعت فيها كل كل الساحرات والعاهرات والحيات

زينب              سوسن مش هى اللى باعت عرابى ولا نفت بيرم التونسى وهى مش بالضرورة تكون موافقة على اللى حصل سنة 48

صابر              ( وهو ينزل الى المستوى الاسفل ) رغم انها موقعة على صفقة الاسلحة .. مش كده

                                        (فلاش باك)

                    (يقف المشهد على الجميع وتخفت الاضاءة تدريجيا ثم تعود وقد ارتدوا ملابس الاربعينيات من القرن الماضى وكلٌ فى مكانه السابق)

صابر              (من الستوى الاسفل،لزينب)سوسن عيزاكى

زينب              ( تصلح من شعرها ومكياجها)هبعتهالك (لسالم)

                    (تبدو زينب كظل فى احد جوانب المسرح وكأنها فى مشهد غرامى مع شخص ما)

رجب              اول ماتيجى هانزل تحت وانت لازم تحدد معاد الدخله كل حاجه جاهزة

سالم               الخوف من الباشا ، من بعد اجتماعه فى السراية وهو مش طايقنى

زينب              (تنادى من مكانها)اتجمعو سوا فيه مفاجأه.. بسرعة

صابر              (يصعد الى اعلى ، وبمجرد صعوده ينظر الى الجهه الاخرى مندهش فى رعب)الكلب حاسبو الكلب جاى علينا (نسمع اصوات نبيح كلب مفترس وصياح من الثلاثة وصوت طلقات نارية وصوت سياط وسارينة البوليس كل هذا مخنلط معا مع الاظلام . حين يعود الضوء نرى كلا فى مكانه قبل الفلاش باك)

سالم               كلبها ده شاهد يوم السراية لما عضنى فيــ……

صابر              (وهو يصعد)مش انتى كنت شاهدة؟

زينب              ما كنش ينفع تهرب وتتجوز

رجب              ليه؟ كل حاجه كانت جاهزه ..كل حاجة،التنجيد والستاير وشبشب الحمام والحِرَام….

زينب              ما كنش ينفع … دي حاجة ضد الطبيعة..السراية ديه مكانها ماتقدرش تسيبها .

صابر              لأ…كان لازم تكون ….

زينب              (تقاظعه)سوسن مش عاهرة

سالم               وانتِ؟

زينب              مش بالضرورة تبقى زيي

صابر              لما تتجوز الحجاج عشان مايصلبهاش تبقى ايه؟

زينب              خلاص تبقى تركتها كفارة ليها

سالم               الدنيا كلها ما تنفعهاش كفارة

زينب              بس…بيتهيألى…دى مش سوسن عشان سوسن سمرة لكن اللى فى الصورة شقرا…وعينيها زرق انما سوسن عينيها سودا.

سالم               لأ…دى مش شقرا بس عيونها زرق…بيتهيألى ان عيونها زرق…ممكن ما تكونش هى.

رجب              ايوه فعلا …دي شعرها احمر…بيتهيألى احمر* .

الجميع            ايوه …فعلا مش هى.

                    (تخفت الاضاءة حتى الاظلام التام )

اللوحة الرابعة

تضاء بؤرة ضوء على الصورة ثم نرى رجب في المستوى الاعلى كالشبح وعلى نفس المستوى وبعد لحظات تتسع البؤرة لنرى الاشخاص الاربعة كأشباح

رجب              يأمرنا الوقت وينهانا

سالم               يرسمنا عقارب دقاقة

صابر              يسمعنا رنين

زينب              يكتبنا ميقاته..أوقاته

رجب              وعلينا فى دوائره ندور

الجميع            او نقبل ان نسكن فى الصمت او بالعكس ندور

سالم               الفاعل مجبور

صابر              المستفعل مأجور

زينب              الرافض مأسور

الجميع            الكل في الزمن يدور

                    (تخفت الإضاءة عدا بؤرة ضوء على رجب والصورة)

رجب              دقات الساعة تقترب من دقات قلبى،انت وحدك التى علمتنى كيف اقرأ الساعة ،كل ماعرفته هو انك الوحيدة القادرة ان تعود بالزمن للخلف .كنت تقولين اننا مجرد حثالة ،شوائب هذا المجتمع.(لحظة صمت يجلس القرفصاء وهو يحدق فى الصورة ثم يبكى بكاءاً مكتوماً)انا اعلمكى سرا وجهرا ،وأرفضك سرا وجهرا…كنت تقولين إن الوقت كعسكرى الشطرنج يسير الى الامام فقط ، ولكنك حطمت هذه القاعدة عندما جعلتى الوقت يعود بى للخلف عاما كاملا

                    (صمـت ،تضاء بؤرة على المستوى الاسفل وزينب و صابر يجلسون جنبا الى جنب ، ورجب يطل عليهم من المستوى الاعلى فى امتعاض والم ثم يعود ويحدق فى الصورة)

رجب              الم تكن هذه سعاد* التى معك فى الصورة ؟ اين عادل اذن؟ (صمت)…وهذا الكلب غريب الاطوار من يكون ؟ هه..من ؟ هل هو تلميذ جديد فى مدرستك ؟ هل اصبحت مدرسة كلاب؟ انه عمل شاق وأنا لا اشفق عليك (لحظة صمت..يتجه ناحية المستوى الاسف ويعود الى الصورة اكثر من مرة.. ثم يقف امام الصورة يكلمها) أنا لن أخبرهم عنك شيئا لأنهم يعرفونك تماما واذكر هذا الزى القمئ الذى كنت ارتديه بينما هم كما يرتدون دوما افخرالاقمشة وازهى الالوان وارقى الموديلات رغم انه لون واحد لون غير دافئ ولا حتى بارد لون ليس له سمة الا القهر.. بيج.. ليه ؟ هه! ليه ده بالذات؟ كنت..(فى هذه الانية واثناء كلامه تخفت الاضاءة ويبدو الجميع كاشباح يبدلون ملابسهم فيرتدى رجب مريلة تيل نادية* “الزىالرسمى للمدارس الابتدائية فى الستينات”بينما سالم وصابر يرتدون شورت بنى وقميص بيج ويراعى ان تكون ملابسهم من خامات فاخرة ، وزينب ترتدى مريلة بيج ايضا من خامة فاخرة و لها جدائل محلاة بشريط احمر) اسأل نفسى دائما عند بداية العام الدراسى..ليه اللون ده والقماشة ديه وليه ماالبسش زيهم ؟… كنت استحى ان اسأل ابى الذى قد ادخر ثمن هذه الملابس على مدى عام ، ولكن لازلت اسأل نفسى سؤال لم اجد له جواب حتى الان ليه اسمه تيل نادية ؟ وما علاقة نادية زميلتى فى الفصل بيه؟ (يضاء عليهم وهم فى فناء المدرسة، بتغير طفيف فى نفس المكان ينادى رجب)نادية من فضلك فى سؤال عايز اسألهولك ..

زينب              أنا…؟اسأل

رجب              بما انك ناديه،ليه عملوا تيل ناديه الزى الرسمى لمدارس الحكومة؟

زينب              لأنه تيل ولأنه بتاعى

سالم               لأ…تيل ناديه مش بتاعك …لأن تيل ناديه بتاع ناديه صاحبة التيل

صابر              تيل ناديه هو تيل اى ناديه في الدنيا

رجب              ناديه معناها ايه فى اللغة ؟

زينب              انهى لغة ؟

رجب              بتاعتنا احنا

صابر              الهيروغلفية

سالم               جاهل . . الهيروعليفية طريقة كتابة مش لغة ثم انها مش بتاعتنا لأننا بنتكلم اللغة اللى بنتكلمها .. بشكل محدد لغتنا احنا.وبالمناسبة هى لغة خاصة جدا بينا احنا

زينب              على كل حال هى معناها معرفوش مع انه سهل .

صابر              كفاية كلام وشوفو حل فى المصيبة دي .. مين الست دى وعايزه مننا ايه؟

رجب              انت عايز تقول انها ابلة رسمية .. لأ .. دى مش ابلة رسمية !!

سالم               (يصعد للمستوى الأعلى ويحدق في الصورة) لأ… ممكن تكون هيه!

صابر              (يصعد للمستوى الأعلى ويحدق في الصورة) ممكن ؟! ده مؤكد هيه ابلة رسمية مدرسة الابتدائى…

زينب              (لسالم) صح يا جورج .. (تصعد لأعلى تحدق في الصورة ) هيه ابلة رسمية

رجب              لأ …… هي فاكرة انها ممكن تكفر عن ذنوبها ناحيتى وتعوضنى عن معاملتها السيئة ليه .

زينب              اسمع يا متطفل انت .. دى ابلة رسمية ودى ان وأنا صغيرة وده (تشير الى الكلب) عم محمد الفراش بس متنكر.

سالم               (ينزل الى المستوى الأسفل) انت هاتقعد ساكت ولا اكتب اسمك على السبورة ؟

                    (ينزل الجميع الى المستوى الأسفل)

صابر              (لرجب) ارجع ورا .. آخر دكة ، مريلتك معفنة تعر الف مدرسة

رجب              مهى تيل ناديه زى مهما طلبين . شبه لبس اخويه اللى فى الجيش

سالم               مريلة تيل ناديه معناها خيشة ، والخيشة لازم تكوم فى دورة المياه…

زينب              هى ابلة رسمية حطتك ليه معانا فى التركة؟

صابر              اصلها اشتراكية تقدمية

سالم               بس أحنا كده وقعنا في مطب .. ازاى هنقسم التركة ؟ هيتساوى معانا ولا هيكون مجرد اسم ؟

زينب              محمد عزت هو اللى يحلها.

صابر              اشمعنى انا ؟ ميكنش ليه جورج ؟

سالم               لأنك رئيس الفصل

صابر              بسيطة… ياخد زينا.. بس لأنه مش زينا هو اللى يدفع ضريبة التركة كلها

سالم               حل مناسب جدا

زينب              لكن تفتكر نصيبه يكفى ؟

صابر              واحنا مالنا .. يتصرف..يبيع المريلة ويكمل

رجب              لأ..(صمت، يأتى صوت رجب من الخارج وهو يحدث نفسه).. “الآن سأجعلكم تحاكمونها وتحاكمون أنفسكم سأفضحكم أمام أنفسكم وانعموا بالتركة إن استطعتم” (يعود ويحدثهم) دىمش ابله رسميه .. مش هى .. لأنها موظفة .. هيه موظفة هتجيب التركة دى كلها منين ؟ هه؟!

زينب              قصدك ايه ؟ رشوة .. ؟

سالم               ولا سرقاها..؟

رجب              (بمكر) اختلاس ..!؟ لأ قرض من غير ضمان ..ولا غسيل .. مش قصدى انها اشتغلت غسالة لأ قصدى غسيل اموال ماهما بعد الانفتاح تخلوا عن الاشتراكية ..وبعد سقوط الحزب الشيوعى بقوا تبع حقوق الانسان.. ممكن تكون تبرعات خارجية من الناس بتوع الحقوق ؟!

زينب              ممكن..؟! لأ مش ممكن ..

                    (صمت لمدة طويلة .. ينظر الجمبع البعضهم البعض ثم يصعدون الى المستوى الأعلى وينظرون الى الصورة ثم الى وجوه بعضهم …)

زينب              هى مش شبه ألأبلة رسمية

صابر              ولا أنت ناديه

سالم               مين اللى افترض انى جورج ؟ ده حتى جورج كان تخين

رجب              انتو كنتو معايا فى الأبتدائية … ؟انا مش فاكر، أنتو اصلا ماكنتوش معايا ولا تعرفو أبلة رسمية

زينب              أنت متأكد؟

رجب              من أيه؟

سالم               انك ما تعرفهاش ولا تعرفنا

رجب              ( صمت )

سالم               ( صمت )

                    ( تخفت الأضاءة تدريجيا حتى الأظلام التام)

اللوحة الخامسة

يضاء المسرح على الجميع ليبدون كالأشباح ونسمعهم .

الجميع            تعرفنا الحكايات ….نعرفها أوقات

زينب              تجعلنا أساطير نستسلم فنطير

صابر              في تلك الحكايات أسماء مقسومة انوات

سالم               مجبورأن تحمل اسماء لاتذكر منها اى كيان

رجب              مهدور حقك لو تطلب أن تسقط من ذاكرة الحكايات

الجميع            مهدور حقك لو تطلب أن تسقط من ذاكرة الحكايات

                    (تخفت الإضاءة حتى الاظلام التام وبعد لحظة صمت نسمع موسيقى منبعثة من الربابة والارغول، تضاء بؤرة على زينب فى المستوى الاعلى وهى ترتدى ملابس منزلية وتتحدث مع الصورة…)

زينب              لاعلم لي بك  (لحظة صمت) أنتِ فحسب كنتِ زوجة ابي (لحظة صمت طويلة،تمسح زينب أثنائها اطار الصورة بقطعة من القماش ثم تنفضها في اتجاه الصورة فتثير عليها غبار ثانية وتظل هكذا فى دائرة متصلة حتى وهى تتحدث اليها)

زينب              لست واثقة إنى اكرهك ، لكن لا اشعر تجاهك بأى عاطفة حب (صمت ،تذهب بعيد عن الاطار)كنتِ فحسب أمرأة تسكن معنا بيتنا وتشارك ابي فراشه … كنتُ اغتاظ منك كثيرا عندما كنتِ تدخلين الحمام وتتأخرين فيه كل صباح …(صمت ، تقترب من الصور فى حنو) علنى كنتُ أود أن أكون مكانكِ وأن يكون منعم بدلا من ابي بشكل محدد جداً أن اكون أنا صاحبة هذه الحالة البيتية … صاحبة هذه الملكية والاولوية والاستقلالية …(صمت، فلاش باك)

                    (تضاء بؤرة على احد جوانب المسرح بالمستوى الاسفل صابر يعدل ملابسه وتخرج زينب من خلف برافان قد وضع على المسرح اثناء اظلام الفلاش باك وهى تعدل ملابسها وشعرها)

زينب              اكثر حاجه بتضايقنى اننا لازم امشى محطتين اتوبيس والملايكه بتلعنى (صمت)مهو حاجة من الاثنين ياتعمل دش هنا ياتبيع العيادة ديه وتأجرلنا شقة

صابر              اولا ديه مجرد اوضه انا مأجرها وبقول عليها عيادة ثانيا لو سبتها مش هنلاقى تمن المواصلات (صمت)الحل اننا نأجل كل حاجة لحد مانحل مشكلة السكن

زينب              السكن … السكن … هو السكن ولا السكون ؟

صابر              احنا مش ساكنين فى مكانا انا كل يوم اروح المستشفى اشوف اكثر من خمسين عيان فى العيادة وبعد كده اطلع القسم اشوف كمان من عشر لخمستاشر عيان ويوم النبتشية جسمى مايلمس السرير اكثر من ثلاث ساعات وبعض احيان ولاثانيه وانت….

زينب              انا مش عارفة اللى احنا بنعمله ده حركة ولا سكون …(صمت)مهو لما نكون بنتحرك كده ومش لاقيين مكان نسكن فيه سوى اكيد ده متبقاش حركة

صابر              مشكلتنا فى مرات ابوكى لانى الاتفاق كان انى اسكن معاكم فى الاوضه اللى على السلم، لكنها أمرت ابوكى يبيعها للراجل بتاع الصابون السائل

زينب              كان ممكن ناخد الاوضتين اللى فوق السطوح عندكم

صابر              مرات ابويه امرته يبيعهم للرجل بتاع تعبية السكر

زينب              خلاص ااجل انوثتى وامومتى وانت اجل رجولتك وابوتك انشألله لحد مانموت (تخرج من البؤرة منفعله)

صابر              ايه هيا الاسرة ؟ وليه امى سابت ابويا يجيب واحده تانية تأمر وتنهى بحجة مصلحة الاسرة.. ليه ؟ تنحرق الاسرة وانا مأجلش حياتى (صمت)بس ازاى(تخفت الاضاءه وتظلم هذه البؤرة ويضاء على زينب وهى تحدث الصورة)

زينب              انالا ارغب فى أن اعرفك (صمت)…أنا لا اكرهك . ارجوكى اتركى عواطفى تحتمى فى ثوبها الدافئ (بعد لحظة صمت يضاء المستوي الاسفل وكل من الاشخاص الثلاث معه رزمة من الورق يكتب فيها… وقد نصبوا مجلساً مثل البرلمان… تنزل زينب اليهم وهى تتمتم ببعض الكلمات…)

زينب              غسلت مواعين الحضارات كلها …كل يوم اغسل مليون طبق … أنا هاطالب فى البرلمان بإلغاء المواعين

صابر              كل كائنات الدنيا مواعين وكل اناء ينضح بما فيه

سالم               فيه نسوان غيرت تاريخ البشرية

رجب              سؤال محيرنى ويمكن تفتكروه بعيد عن الموضوع لكن لوعرفنا الاجابة يبقى حلينا الموضوع .. ايه العلاقة بين الرجلين والعجلة ؟… حد يفهمنى

                    (صمت)

زينب              (تُخرج من احد الجوانب بعض الملابس الداخلية وتجلس لتغسلهم) كولوناتى عمرها مانضفت …نقعتهم فى بير ديتول …كنت لازم اشترى ديما شرابات جديده …

سالم               (ينظرنحوها)

زينب              شرابات …قلت شرابات …

سالم               الشر بات فى السراير ،والسراير اسرار ، مين فينا يعرف ابوه هايتجوز مين قبل ما يخلفه منها؟

زينب              (تترك ما كانت تفعل وتذهب فى اتجاه سالم بينما يضاء على الصورة ) مرات ابويا هى اللى عودت ابويا يشرب الشاي بعد ما يصحى مباشرة…(صمت)

صابر              أراجوز …أبوكى عامل زي الاراجوز … ايد وحده بتحرك كل حاجة فيه … ايد واحده … وصوته من حتة صفيح*ومش هو اللى بيطلعه (صمت)…أمك ماتت ولا ده مبرر؟

زينب              أنا معرفش مين امى اصلا…التاريخ معرفش يحددها هى مين بالظبط … مؤرخين قالوا أن امى هى نفرتارى، والمستشرقين قالوا انها “أمينة رزق في فيلم الدكتور”…واغلب المؤرخين قالولى انت بنت كلب فاجرة مانعرفلكيش ام، لا أنت ولا كليوباترا…

سالم               أنا مالى بيك وبأمك … الست دي تقرب لك ؟

صابر              (منفعل)عمالة تقولك مرات ابويه (يستدرك الهفوة سريعا)مرات ابوها هى

سالم               إحنا مالنا بقى تجيب سيرتنا فى الوصية الزفت دي ليه ؟

                    (تصعد زينب الى المستوى الاعلى تحضر حقيبة كبيرة وتخرج منها بعض الاوراق والاشياء)

رجب              (يصعد اليها فى خلسة ويأخذ الاوراق وينزل) كل الاوراق اللى فيها سر التركة هنا

زينب              انت مين اذن لك تفتش فى خصوصياتى ؟

سالم               ايه هى يعنى خصوصياتك ؟ البنتاجون نفسه اخترقه عيل صغير على الانترنت…

زينب              (تنزل بالحقيبة الى المستوى الاسفل وتخطف منه الأوراق) وشرف امى لوحد فتش الورق ده لاكون مصورة جناية.

رجب              (يهم ليتقاتل معها)

صابر              (يحاول فض الاشتباك)

سالم               (يذهب ويقف بينهم ويتكلم بحدة) من فضلكم مفيش عنف يحصل هنا والا هنلاقى الف الف كلب يتدخلوا عشان يمنعوا العنف لانه ضد حقوق الانسان وينهشوا فينا وفى التركة والصورة

                    (صمت للحظات ويبدى الجميع موافقته وكل منهم يتجه ال مكانه)

صابر              خلاص طلعى انت اللى فى الشنطة..

زينب              (تجلس وتخرج من الحقيبة اشياء) ده شراب ابيض كان بتاعى وانا فى الابتدائية …(صمت)

سالم               إف .. ابعديه عنى بلا قرف

زينب              قد ايه كان ابيض وجميل …مش عارفة ايه اللى وسخه كده…

صابر              ماعلينا…نشوف اللى بعده…بس اوعى تطلعى كافولة ولا…

زينب              ودي اول فوطة صحية استعملتها فى حياتى ، مصنوعة من البردى ..كانت لطيفة جدا…وده اول منديل ايد امسكه كنت فى اولى اعدادى …ابوياجابهولى من المصنع اللى فتح جنب بيتنا …كان اول مصنع بلاط يفتح فى حيِِنا ، امى رسمت لى عليه فرس وكرباج ..

سالم               رومانسية قوى الله يرحمها…

زينب              قلتلك امى ماماتتش ، هما مش عارفينها اصلا ..

سالم               ايه شجرة الدر … (ينحنى علي صورة من امام زينب ويلتقطها) هيه والله العظيم

صابر              امك … ايه يعنى …طظ

زينب              دى امى انا ؟(تنظر تجاه الصورة) قلتلكم دى مرات ابويا…

رجب              شجرة الدر ؟!

صابر              لأ…اللى فى الصورة…

سالم               ايا ان كانت امك او مرات ابوكى مش مهم المهم كتبت اسمينا ليه في الوصية ؟

زينب              (بعد تفكير واندهاش)هو مين اصلا اللى قرا الوصية دي ؟

رجب              (ينفى عن نفسه تهمة) مش انا

سالم               الوصية مكتوبة عندكم…هناك…على المسلة اللي في باريس…اللى عايز يقراها يروح هناك…

صابر              أنا مصدق …اللى مش مصدق يروح روما يقراها على المسلة هناك….

زينب              دا كان مجرد سؤال …

رجب              نرجع لنفس السؤال…الست دي تقربلك ؟

زينب              ……

سالم               أنت متأكده أنك تعرفيها ؟

زينب              ……

                    (تخفت الإضاءة ونسمع صوت الجميع ونراهم كأشباح تحت الضوء الخافت)

الجميع            صوت يلهمنا ان نحيا ان نسكن داخل معنى  الكون

صابر              لكن مجهول ان ترضى نسيان الوقت

رجب              يأمرنا الوقت وينهانا

سالم               مجبور ان تحمل اسماء لا تذكر منها اى كيان

الجميع            مهدور حقك لو تطلب ان تسقط من ذاكرة الاحداث

                    مهدور حقك لو تطلب ان تسقط من ذاكرة الحكايات…………

                    (تتردد العبارتين الاخيرتين ويخفت الصوت مع الاضاءة حتى الاظلام التام)

                    ســــــــــــــــــــــــــــــــــتار

    القاهرة    من11/3/200الي4/7/2006

* كل الوصف الذى يذكرونه غير موجود بالصورة

* عادل وسعاد شخصيات من كتاب القراءة الخاص بالصف الاول الابتدائى فى الستينيات

* الصوت الذى يصدر عن مؤدى الارجوز يكون من آلة من الصفيح تسمى الامانة

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock